საქართველოს საგარეო საქმეთა სამინისტრო ყირიმში გამართულ ე.წ. რეფერენდუმთან დაკავშირებით საგანგებო განცხადებას ავრცელებს, რომელშიც ნათქვამია, რომ საქართველოს ხელისუფლება რეფერენდუმს და მის შედეგებს არ ცნობს.
საქართველოს საგარეო საქმეთა სამინისტრო ყირიმში გამართულ ე.წ. რეფერენდუმთან დაკავშირებით საგანგებო განცხადებას ავრცელებს, რომელშიც ნათქვამია, რომ საქართველოს ხელისუფლება რეფერენდუმს და მის შედეგებს არ ცნობს.
`საქართველოს საგარეო საქმეთა სამინისტრო არ ცნობს 2014 წლის 16 მარტს ყირიმში ჩატარებულ რეფერენდუმს, რომელიც შედგა რუსული შეიარაღებული ძალების მიერ წარმოებული ზეწოლის ფონზე და საერთაშორისო სამართლის საყოველთაოდ აღიარებული პრინციპებისა და უკრაინის კანონმდებლობის სრული უგულებელყოფით.
რუსეთის მიერ ყირიმის ანექსიის მცდელობა წარმოადგენს, როგორც მრავალმხრივ, ასევე ორმხრივ შეთანხმებათა ფარგლებში რუსეთის მიერ აღებული ვალდებულებების უხეშ დარღვევას.
საქართველოს საგარეო საქმეთა სამინისტრო კიდევ ერთხელ მკაფიოდ ადასტურებს უკრაინის სუვერენიტეტისა და ტერიტორიული მთლიანობის მხარდაჭერას, მისი საერთაშორისოდ აღიარებული საზღვრების ფარგლებში და მიმართავს საერთაშორისო თანამეგობრობას, კონსოლიდირებული ძალისხმევით აიძულოს რუსეთის ფედერაცია, დააბრუნოს საკუთარი შეიარაღებული ძალები საწყის პოზიციებზე, დაუყოვნებლივ მოახდინოს მდგომარეობის დეესკალაცია ყირიმსა და უკრაინის სხვა რეგიონებში, დაიწყოს პირდაპირი მოლაპარაკებები უკრაინის ხელისუფლებასთან და ითანამშრომლოს საერთაშორისო თანამეგობრობასთან არსებული მდგომარეობის გადაჭრის გზების მოძიების საკითხში,`- ნათქვამია განცხადებაში.
